17 مايو، 2008

جاتنى الشمس وطالبه تبوسك


نهى من بعض نور الصباح وطيبة الندى ، تهدي الحياة بذرتها الأولى من النقاء وتعاند الحزن داخلي ببسمةٍ تتقنها يديها على وجهي

( نهى )
....
صديقتي العزيزة جاءت للأرض بملاكها الأول

" عليّ "

أنا مبسوطه بجد أوي ليكي ياحبيبه ورب يخليه ليكي طوق نجاة ورضا من الجنة

و ...

حلاقاتك برجالاتك حلقة دهب فى وداناتك
يا حنتوسك يا فنتوسك يجعل عمرك أد الدوسه
جاتنى الشمس وطالبه تبوسك خجلت من ضى ابتساماتك

حصنتك ما تشوف الذل بخرتك بخدود الفل

ورقيتك من عين الكل النبى حارسك من عتاراتك
قلعتك حرز لبستك حرز
القامطه حرير والصوف ع الشرز

قلعتك طاقه لبستك طاقه وكتبت حجابك على وبر الناقه
يكفيك الشىء والعيا والضيق وسكوت الناس وكلام العين
قلعتك قابه لبستك قابة ابعد يا شطان وتعالى يا شابة
لفية وارقية واسهرى سلية وفى برد الليل ضميه ودفيه
قلعتك عافية لبستك عافية ورميت هلاهيلك فى المية الصافية
وغسلت ذنوبك وقريت مكتوبك السعد مواعدك والهنا محسوبك

يا ربنا يا ربنا يكبر ويبقى زينا
طق الودع سحر وبدع سعد السعود فى قصرنا

تتا تتا خط العتب ودوس على كل العتب
واللى انقرى واللى انكتب
واسرح فى نعمة ربنا
يا ربنا يا ربنا يكبر ويبقى زينا

خد البشارة يا حسن وافتحلنا الفال الحسن

وابعت على عيونة الوسن نوم العوافى والهنا
يا ربنا يا ربنا يكبر ويبقى زينا
نام نام نام نام وادبحلك برجين حمام واعملك طاجن وبرام
واقعدلك سهران ما بنام
واغزلك زعبوط وحرام واخطبلك بنت من الشام
واقطفلك ورد الأحلام واكتبلك ع الورد كلام

حسادك بايتين الليل يتلووا على نار الويل
سهرهم ودموعهم سيل
شتتهم لو جالك ميل
واتحصن منهم بالخيل
وملايكة شايلينك شيل
نام نام نام نام وادبحلك برجين حمام
....

استماع محمد منير و كلمات أحمد فؤاد نجم
من مسرحية الملك هو الملك


هناك 5 تعليقات:

  1. كميل اوي الكلام
    واكيد كميل برضه ابن صحبتك
    انا كمان انتمتي العزيزه في نتظار قدوم حادث سعيد
    :)
    يارب يكرمهم ويجعلهم نور لاأهلهم
    :)
    مساء الخيرات يانوني

    ردحذف
  2. حادث سعيد
    الجملة دي موحية قوي
    الست دي في انتظار حادث سعيد

    ربنا يكتر من احداثك السعيدة وكل اللي تحبيهم

    ردحذف
  3. وووووووووو بقالي يومين بتصل بمروة علشان هي كمان هتجيب نونو قريب
    ايه اخبار الحياة
    .
    .
    الدنيا سكر بنات

    ردحذف
  4. ايه ده يا نهى
    دانتى قديمه اوى
    وكمان حنتوس وفنتوس
    هى حصلت؟
    مبروك الضيف العزيز وان شاء الله لما يكبر تكون مشكلة العيش اتحلت ويلاقى بلد كويسه يعيش فيها

    ردحذف
  5. محض روح

    أمين ياجميلة :)
    ورب يسعدك ويسعدها بالحادث السعيد
    ومساءك بسمة وندى يادندن

    -----

    مصطفى السيد

    عندك حق على فكرة كلمة بسمة وسعادة وفرحة ليها عنوان مميز بما تقترن به حتى لو مش نسبته كبيره :)

    ويكتر من سعادتك
    ومنور دايما يافندم

    -----

    غاديليو

    طب ابقي طمنيني ع النظام
    والحياة
    .
    .
    مرايتي يامرايتي

    -----

    هنداوي

    ياهلا أشرقت الأنوار يادوك
    وماله القديم القديمة تحلا ولو .....
    والله يبارك فيك وإن شاء الله يكون هوا ليه دور في الصعود بس يلاقي ناس كويسة قادرة تعمل من بلدها شيء
    نعيب زماننا يافندم .....

    ------

    ردحذف