26 مايو، 2009

أسود في موف


لأسباب إستهترها البعض دائما

هي مخنوقه .. أه يمكن !


من كام يوم و لا من كام شهر و لا يمكن من عمر بس كانت بتضحك بتضحك عشان تثبت إنها كويسه للكل .. هي كويسه لكن صحيت على أيام جايه زي الجِيلي مابتحبهوش .. مبهمه ..

..
بتتوجع بالليل عشان تبكي الصبح اللي هيوجع عنيها لما تفتح تكتشف إن لسه فيه غفلة و لسه الناس مش مهتمه تحس أوي و لسه الليل مِعلم ع النقط البيضا اللي فاضله في عنيها بتلمع

اللي كانت بتلمع أقصد !


خالتو بتقلي عنيكي دبلت بطلي قاعدة كمبيوتر متعرفش إن البنت ماعدتش نفسها بتلمع بعد الصبح الذي لا يجئ ..

ليه البنفسجي لعنة محوطاني بحزن ومع ذلك اللون المفضل عندي ! ، و ليه وداني بتدب بالليل على الدمع ؟!

لما أظهر أون مبعملش شيء غير إني أثبت إني هناااا يا ناس و الله هنا .. مش مغيمه و لا أنا من هلام ماشي ع الحيطان منحني

أنا كائن أسود ما أنكرش ..
بيرقص معووج في اتحاه عكس التيار فبيتزق ، و بتلبس فستان أسود تغطي ياقته بوردة موف عشان تداري عضة الكسر اللي في رقبتها

و تفكر نفسها ( ماتشاركنيش في الرقص يا نورا الرقصة مُره و انتي عضمك طري )
- رجب الصاوي -

نورا الاسم اللي كان بيدلعني بيه خالو أحيانا و يظهر نحسه بقى مقترن بيا ، ذكره في الشعر يأس و أفتكر فيلم نورا لنيلي ماتت في الأخر أو انتحرت .. مش فارقه كله واحد عشان ماهياش حلوة ولا بنورا

و يا ترى هموت امتى ؟

لما بتصحى بتمثل إن الأيام هتلونها خوخ وهتشتري الباذنجانة لميرال رغم إنها قريتها مرتين ، و هتجيب وردة موف عشان الوحيدة اللي جبتها كانت غلط في يوم ماكنش أصلا

و اممممممم هي عايزه ترجع تتمشى الصبح ع النيل

و تتنفس

تتنفس للمرة

و ييييييوه لو تحلم بسينما فاضيييييه

فاضيه بجد .. فاضيه وهتمثل إنها مش لوحدها

عادي يعني ماهي سمعت مدحت صالح ( الزمن وعدوا قام صدق اتشوا و أهي ضربت شقلباز )

يمكن هتقرر تبطل تحلم إنه فيه أي أمنية هتيجي و إن النور جوا القلوب عشان مطفيه ، و مش هتحلم إن حد أيا كان يصدق ويطل من الشباك الموارب و يقول أنا لغيت مواعيد مش مهمه عشان اللي مش أهم ..

إيه رأيك في تمشية ع المايه ؟

حافية ومغمضة ع الأمان .. فيه ع البر نجاة بس أمني بده ..

فيه ع البر نجاة بس أمني بده !

فيه ع البر نجاة بس أمني بده !

...

يا رب كن معي
....

هناك 5 تعليقات:

  1. مش اول مره اعدى من هنا و كلامك يلمش قلبى
    بس المره دى مش عارفه ليه وجع اكتر

    أنا كائن أسود ما أنكرش ..
    بيرقص معووج في اتحاه عكس التيار فبيتزق ، و بتلبس فستان أسود تغطي ياقته بوردة موف عشان تداري عضة الكسر اللي في رقبتها

    صادقه .. حساسه لابعد حد

    دعوات

    ردحذف
  2. يفتح باب بيت المدونين ذراعيه لكل الموهبين في :
    1/ القصة القصيرة
    2/ الشعر بشتى أنواعه
    3/ الرواية "رواية سنوية سنقوم بنشرها في الجريدة"
    4/ المقال الصحفي
    إذا وجدت في نفسك القدرة على المشاركة أرجوا التواصل معي على الميل التالي
    arabicsabah@yahoo.com
    شروط المسابقة
    1/ ..............................
    2/ .............................
    3/ ..............................
    لا يوجد شروط الشرط الوحيد هو العمل الجيد , والعمل المحترم البعيد عن الإسفاف
    المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
    أرجوا التفاعل معنا في الجروب على العنوان التالي
    http://www.facebook.com/group.php?gid=45202724108#/group.php?gid=78080770039

    ردحذف
  3. شدني الصدق هنا .. شدني اوي و اكتر من اي حاجة ..
    في ع البر نجاة .. بس أمني بده ..
    و الله في ..

    عارفة اني لاقيت ناس بتحس .. و ناس بتحب .. و ناس بتدفي .. و ناس قريبة ..

    هم كانوا موجودين طول عمرهم ...
    بس انا اللي كنت عبيطة ، و قاعدة مستنية انهم هييجوا من مكان محدد ، و ان الفارس اللي هيجي يثني ع البنفسجة اللي في شعري لازم لكون له شكل معين ، و هييجي من الاتجاه اللي بفضل باصة عليه بصة عليه .. و مبيجيبش حاجة ..

    الدنيا خلافة و غدارة .. متأمنيش
    لما بنستنة الصبح من ناحية .. مش بييجي
    مش عشان مالناش في الصبح نصيب .. ا عشان بيطلع في حتة تانية غير الحتة اللي متنحين قدامها مستنيينه يطلع ..

    انتي حلوة اوي .. اوي بجد ...
    ربنا يرحك و يراضيكي يارب

    ردحذف
  4. يمكن هتقرر تبطل تحلم إنه فيه أي أمنية هتيجي و إن النور جوا القلوب عشان مطفيه ، و مش هتحلم إن حد أيا كان يصدق ويطل من الشباك الموارب و يقول أنا لغيت مواعيد مش
    مهمه عشان اللي مش أهم ..

    اد ايه الاحساس عالي والكلام بيوحع بس حقيقي حدا
    كمان اد ايه لما تكون طول الليل بتعيطي ويقولوا لك من القعده قدام الكمبيوتر وكان
    محدش حاسس بيكي خالص

    البوست جميل وموضوع السينما الفاضية وانها ح تمثل انها مش لوحدها ده كمان يوجع

    شكرا علي البوست الملئ بالاحاسيس الجميلة

    و ييييييوه لو تحلم بسينما فاضيييييه

    فاضيه بجد .. فاضيه وهتمثل إنها مش لوحدها

    ردحذف
  5. سهر
    و بستنى مرورك دايما يا جميلة
    لأنه صادق

    ...

    آية
    أنتِ الأجمل
    أسعدني ردك جدا بقدر دفئه

    و بالنسبة لانتظار الصبح
    و الله مابقيت أنتظره من أي حتةلأنه لو جيه هيعلن عن وجوده مهما كانت الحتة اللي واقفين فيها ، لأنه صبح ..
    بس مابيجيش !
    ربنا كريم
    ...

    nudy
    أنتِ أجمل وإحساسك أحلى
    اتمنى زيارتك دايما
    ...

    ردحذف