17 أكتوبر، 2007

آخر أيام المشاوير


إمبارح كان يوم سعيد في وشوش أهل صاحبتي الأنتيم جدا ، كان فرح أخوها وكنت مبسوطة ليها يمكن لأني الفترة ديه بحاول أفرح بضحكة الناس القريبة مني ، طالما هيا بعيدة عني ... ويمكن لأني حسيت فرحتها أوي ، ودعيتلها الفرحة تدوم
...
كان يوم بيُصر إنه يقولي إفرحي ... لأول مرة من فترة كبيرة أشوف أصدقاء الجامعة لتاني مرة رغم إني شفتهم من فترة قريبة كانوا معظمهم في الفرح كنا متفقين على حاجة واحدة من غير ما يكون فيه اتفاق مسبق ـ إننا نفرح ـ رغم إنها كانت سنة فيها أشياء موجعة لكتير منا
لكن جوانا كان بيحاول يسيب ملامح ابتسامة بتتشرخ من فترة
كان يكفيني الضحكة اللي جوا عيونهم بتعافر تطلع مهما كان ، علشان أهدى شوية
...
حتى قبل ما اروح الفرح ، رغم فقداني الأمل الفترة ديه لدرجة إني لأول مرة كنت بعلن عدم رغبتي في البحث عن عمل كأني بسيب كل حبال الأمل تدوب ويا كتير وقع .... رغم كل ده ناس أعرفها ومعرفهاش وناس اهتمت رغم تقصيري معاهم سألوني عن السي في وطلبوه مني
.
يمكن فيه حاجة بتحاول ترجع مني شيء ، وتقولي ليه الابتسامة رسمه شفافه فوق الوش
...
وكانت المطرة حلم آخر بيقولي ادعي وحاولي تفرحي زي دايما ما كنتي بالمطرة
بس ساعتها مافرحتش بيها كنت حاسها الشيء اللي بحبه .. وبس ، ورسم ابتسامة باهتة لكن مش زي كل مرة بيبسطني أوي وافتكر "وشتي يا دنيي تيزيد موسمنا و يحلى و تدفق مي و زرع جديد بحقلتنا يعلى " ـ
كنت بس محتاجها علشان أقول لربنا أنا بعيدة وحاسة إن فيه حاجات كتير ضاعت مش هسأل ليه بس عايزة أرتاح من حزني بسببها
....
..
فيروز
..
ليه رغم كل ده ، لحن الفرح حزين
.
ـ آخر أيام المشاوير
....
في غيمه زرقه وبرد كتير
وحدي منسيه ... بساحه رماديه
أنا والليل وغنيه ـ
------

هناك 8 تعليقات:

  1. كان يوم بيُصر إنه يقولي إفرحي

    كان بوست بيصر انه يقولي اندهش

    تحياتي الكبيرة للفنانة الجميلة الكبيرة أيضا

    ردحذف
  2. أخر إيام الصيفية
    أغنية رائعة جدا ..مع ان لحنها مبهج ولكن تحسي فيها بحزن
    ..تماما ككلماتك

    ردحذف
  3. نزلت القاهرة يوم الأربع والجو في بلدنا كان شبه حر لكن لما وصلت القاهرة المطرة كانت كتييير وجميله كل الناس في العربيه ساكتين الراديو كان شغال كاظم بيغنى مدرسة الحب والمذيعه بتتكلم عن المطر وأنا مبتسمة اوى وبغنى مع كاظم ومخرجة إيدي بره العربيه ساعتها افتكرتك بجد وتأكدت ان كل الناس في العربية بيقولوا عنى مجنونه
    عايزة اشوفك قريب

    ردحذف
  4. مصطفى السيد

    شكرا لك
    بس كبيرة سنا هقولك ماشي

    لكن فنانة جميلة وكبيرة أشك بقى
    وعموما
    مرورك هوا اللي أكيد نورني
    ------

    human

    تعرف ان الاغنية ديه
    بحب آخر جزء منها وأنا منتعشة والغزالة رايقة بس ده أعتقد من أيام وشهور بعيدة أوي

    حاليا بقيت أحس الجزء اللي في النص من غير الاخير

    ونورتنا

    ------

    الطائر الحزين

    ممكن

    نورتني

    ------

    غادة الكاميليا

    ياست غاديليا سحبنا الدلع
    بقى كنتي في القاهرة يوم الأربع ومتقوليش ولو طلعت انك كنت في الساقية
    يبقى اشوف فيك يوم حر من غير ندى ولا فيروز

    وتفتكريني بكاظم اكيد لما قال علمني حبك أن أحزن
    ههههه
    وبعدين يقولوا اللي يقولوه احنا بيهمنا أنا عن نفسي ساعة الفرح كانت الدنيا بتمطر سبته وخرجت بره في المطرة ... جنان جدا
    هههههه

    تصدقي اليوم ده كان عجيب من الصبح كنت مكتئبة جدا ولما فكيت شوية نزلت الساقية رجعت ريما لعادتها الهباب
    كنت عاملة زي اللي مأكلينها وجع أخرس

    واللي معايا متهيئلي اتخنقوا مني وزهقوا مش هلومهم متهيئلي الطبيعي انه يتزهق مني
    المهم كان فيه شجرة داخلة مزاجي أوي وردها أصفر في أبيض وجاية بزاوية الكافتيريا ووراها النيل حاضن ضي القمر ولحن عمر خيرت كان شغال عارفه حسيت إن الماية بتتمرجح بهدووووء مع اللحن كان نفسي ساعتها المطرة تنزل جامد أوي ويدخل لحن فيروز بتاع شتي يادني

    ساعتها افتكرت حلم القناطر والبسكليته فاكراه ؟؟؟

    ومستنية السيادة يافندم نحن في القاهرة 24 ساعة إلى أن يتبرى منا أهالينا

    ردحذف
  5. فلنبدأ بابتسامة باهتة ثم تطبع بالالوان رغما عن الحزن الكثيف


    ان شاء الله المرة الجاية الفرحة تكون فى بيتكم

    قولى آمين

    ردحذف
  6. لا ادري للحزن طعم مختلف في الحلق ... للحزن روح أخرى ... روح انسانية ... لا ادري لماذا ارى فيه نبض آخر من الطهر...
    هذه ليست دعوة للحزن ابعد الله عنا كل ما يحزن... لكن البوست جعلني استعشر وكانها حالة عامه ليست قرينة بي فقط...
    يارب يجعل ايامك كلها خير وسعادة...
    دمت بكل ود...
    خالص تحياتي

    ردحذف
  7. مممممممممممم
    الحياه مزيج غريب بين الفرح والحزن
    كله بيعدي الي بيفرق هو احنا ياجميل
    ربنا يديكي كل الي عايزه
    بص نصيحه حولي تغيري شويه في الي حوليكي
    وابداءي من نفسك
    التغير كتير بيفيد
    واقل حاجه هتفرق معاكي
    حتى لوغيرتي مثلا شويه في اللوان لبسك الميك اب
    المزيكا الي بتسمعيها
    حطي نفسك في جو غير الي انتي فيه
    صدقني لو مافدكيش دلوقتي مش هيضرك

    ربنا معاكي يارب
    :)

    ردحذف