30 أغسطس، 2009

سَكتـَالـَك




ـ نظرا إني مش في مود بوست جديد وعايزه أحط أي حاجه ليا فخلينا في أي حاجه قديمه
ونتخلص مما لا بد التخلص منه -

...........................................................




[ كت دايما بتشيل الضعف ف جيبي
وتمشي
بتعاهد بابي إنه يقَفِـل جامد ع الجرح
لما تعدي ريح البرد
نِهدي
وماكنش الباب متوارب
يوم ما لتقيتك
ولا كان متكسر جوانا
علشان نسهى فـ لحظة غيبه
ويملانا بيك ]

كان طيفَك ضي
وعنيك بتحاوط ملامحها
فتبات مغلوبه
مش كل كلامها معاك كان ساكت
مش معنى هروبها ويا سؤالك
إن أنا ببعد
لو بس تمهل خطاويك
تتكى على صدر اللحن الدافي
متخبي ف آخر طرف الجيب
هيبانلك ... فتحس
فيروز مش حلم غموض
ولا أبعد من نطة حس
فمتحضنهوش
دنا كنت بخاف لتشف المتخبي
وتنور ليلي الواقف
بيراقب نوم البنت
كان بينبهني لتصحى
فتشوف السر

" بكتب اسمك ياحبيبي ع الحَور العتيق "

بلضم من حكايات السما غناويك
بركن كام نجماية تِفتح آخر عتمة ف صوتك
من كام ليلة حكيتها معايا
من غير ما هقولك راح هتحس
دا بعادك دايما ع البال
بيذقك جوايا .. فافتكرك
مش كان خريف دا لو مامسش قلبي بلسعتك
وقالي غاب

ـ طب امتى راجع ـ

والشتا بيدق البيبان
فَنقَفِل شباك وجعنا بضبتين
ليروحوا منا آخر نبرتين
بيضموا روحي .. ساعة غروب

امتى راجع ؟

والبنت ملسهاش عاشقة السكوت
بتسند وقفتها على كسر العود
ولأنها ملقتش ايديك آخر سكة حلم
بتلحن خوفها ...
فبيشرخ صوت الخطوة ف سكتها

امتى راجع ؟

اوعاك يكون القطر واقف
قبل قلبي بسكتين
دا البحر شاهد ع الأمانة وندهتي
أنا الوحيده عارفه الغروب
وبسلم عليك

..

ـ برده منتاش هنا ـ
والقاك يادوبك بين يومين
زي طيف
لساه مغيم أو ناسيني
معرفشي ليه
مع إنه رغم خوفها ورغم وعدي
ورغم حاجات كتير
مفرقاني ف سكتك
ماكنش قلبي متوارب
إلا ليك


[ بضم أنا وجعي
واتلكفت من تاني فـ أحضانها
بنحاول رغم حبال الغربه
نغزل نفس الصورة الـ كانت
وبنبعد ]



نهى جمال
30 نوفمبر 2007

. . . . . .

هناك 6 تعليقات:

  1. تحملى خيالى قليلا ..
    أقرأ كلماتك تلك وعلى البال أغنية لعايدة الأيوبى ؛ تعرفيها " صدفة "
    موسيقى فلوت للحنها ..دون صوت، والكلمات ..فقط
    قراءتك شجن ..
    طبت دوما

    ردحذف
  2. فيروز و الحجار و شجن يجمعهم و يفرق ع الكل ف نبض حزين
    ما نملكش غير لما نعدى اننا نتزود منه

    عجبنى اوى التركيبه دى و الحس ده

    دومى رائعه

    ردحذف
  3. حلوة قوي على فكرة

    يمكن بتوجعني زيادة ... بس مستحلية الألم ..

    ردحذف
  4. يا بنتي انتي موهبة
    وتستحقي تبقي صاحبتي الأنتيم كمان

    ايه رأيك؟ :))


    واحشااااااااااااني !

    ردحذف
  5. نهى..
    وحشاني والله يا بنتي
    انتي بجد كتت سكرة
    ربنا يسعد عمرك ويحقق املك

    ردحذف
  6. فريدة
    ومرورك فرح يُنعش كموسيقى هادئة
    دمتِ رائعة
    ...

    سهر
    و بيعجبني مرورك المحسوس دايماً
    تحية لقلبك
    ...

    هدى
    وإنت أحلى قوي على فكرة :)
    ...

    رونا
    أه موهبة بالمهلبيه حد يقدر يعترض يا صديقة :D

    وحشاني جداً خالص
    ...

    إيمي
    تصدقي نفسي أشوفك جداً
    يا سكر بالهنا
    منوراني
    ...

    ردحذف