22 أبريل 2013

أن تكون مُتعَبًا حد الزوال !


عن ازاي تُدرك إنه " يكون حلمك أصيل " فـ " تلاقيه لقدامك مشي " يا محمد يا منير ؟ أصلي أنا مابعرفش غير إني أتكحل وأتعمي ! وقلبي داب .. داب قوي داب زي الأيس كريم في الحَر وأما يجي عليه الشتا بيتجَمِّد في غير هيئتة " مَهري قوي" وتَعبني زي الطُرق اللي جَرحَها الفُراق ! بأُشفق ع أي حد مُنتظر منه شيء أو بيحاول يعيد تفاصيله ! هو ليه مش ممكن نِنحته تاني ؟ " كأنَّكَ تحملُ عنها الندى " ؟ بحسد كل لوحة قِدر حد يلمسها ويعيد لها التفاصيل ويمكن عشان أنا مش عارفة أبقى بجمال الفكرة ! .. وبأشفق ع روحي من الفقد / والخوف منه / الفقد دايمًا .. بتبقى طعمها مُرة قوي ومضطر تتعايش بيها زي دوا السرطان اللي لازم تتنفخ بيه طول العَيا ! .. بحسد برضو الشوارع المتقاطعة عشان بتلاقي فُرصة تتقابل وتـُحضن بعض ساعة البُكا ! .. بقالي سنتين مستنية " الشمس " اللي " راجعه بضيها متشوّقه ليوم الوصول " لحد ما الشمس نفسها اتبرت صدأ ! أنا فيه حاجات هايفة بتحطني قدام شيء مُرعب هو إني فقدت الثقة في الحياة تمامًا ! أد إيه أنا فقدت الثقة في حاجات كتير لحد ما بقى من السخف إني أشعر معنى " لبُكره غني و قَسمي " .. أي بُكره !!! 

....

هناك 7 تعليقات:

  1. هتروق السما بابتسامتك

    ردحذف
  2. ما أن قرأت هذه الجرعة من القتامة الصباحية، حتى تذكرت قصيدة للشاعر التركى ناظم حكمت، أغلب الظن أنى تذكرتها لتُحدث بداخلى شيئا من التوازن بعد جرعتك المُرّة هذه

    أجملُ البحار
    هو البحرُ الذى لم نذهبْ إليه بعد
    وأجملُ الأطفال
    هم الذينَ لم يكبروا بعد
    وأجملُ الأيام
    هى تلكَ التى فى انتظارنا
    وأجملُ القصائد
    هى تلك التى لم أكتبها لك بعد

    شكرا لناظم :)

    ردحذف
  3. غير معرف

    مُنير كان بيشتغل الجميع بالأغنية ديه
    شكرًا عمومًا :)
    _

    محمد

    آسفة حقيقي على القتامة لم أقصدها !
    وربنا يخليلك ناظم :)

    ردحذف
  4. نفسي أفهم حاجة واحدة ...


    يمكن لو ..
    إيه ؟؟

    ردحذف
  5. كان بوست مجنون ومسحته :)) كان بيتكلم عن إنه مش الكُره أولى من الحُب يا براهيم ؟؟بدل وجع القلب والهري والبلا الأزرق اللي بنعانيه مع الحُب :))

    ردحذف
  6. نحن نطالب بعودة البوست الـ مجنون (ظلمًا) بل ونطالب بمناقشته مناقشة مجتمعيةَّ موسعة ..

    ..
    مبروك اللوك الجديد :)

    ردحذف
  7. يا براهيم
    مش عايزة أكئب الناس وأحبط ناس برضو كفايه البوست الكئيب ده :))

    وبعدين كفاية ع البشرية إنه البوست كان فيه أغنية " يمكن لو " :))

    بس أوعدك يومًا ما ممكن نفكر ننزله تاني

    مبروك علينا افتتاحك للوك الجديد :)

    ردحذف