2 يوليو 2007

نقطة فـ جملة



نقطة
محطوطة فـ آخر جملة
اتفقت فيها معاها ونسيت
فضلت ترجع
وبدأت تاني بالمقلوب
...
بتحسس ع الجدران
يمكن تتكعبل
فـ الظل المكسور جوا المريات
مدرتشي
إن الفرق ما بينهم
كان الخطوة
لو لفت راح تعرفها
...
تتخفى فـ أقرب كرسي يونسها
بتضمه
كالعادة بيرفض
ومعرفهاش
...
تتسحب جوا صفح النت
تِدور
يمكن تلقاها فـ قصة حد
اهتم بجد
حفظها فـ صورة
وحط فوقيها حِداد للذكرى
لكن ملقتش
...
فبتمسك محمولها
وتبعت ليها رسالة بتوجع
اكتشفت
إنها آخر مرة بعدت عنها ماهتمتش
سمعتها بتنده ماتهزتش
سابت كل صداها سراب
اتسألت فين خطاويها
وسكتت
نسيت كل عهودها معاها
وخالفت
غصبٍ عنها
كانت فاكرة
إن الإيد الساكته معاها
فـ يوم طاوعتها
مسكة أقواس الحلم تحدي
وقفت تتشرط
ايه تسمحله عبور الحد
وايه بتسد فراغ القوس قدامه
وتبعد
وجوا طريق الوهم
لقيت خطوايها
بتشق طريقها بره أقواسها
وتخرج
وبترجع بالمقلوب
نقطة في أول جملة
وماتفقوش
-----

هناك 17 تعليقًا:

  1. قلتلك قبل كده إني بأحب أقرا شغلك يا نهى
    بجد لو انتي ركزتي انك تبقي شاعرة هتبقي شاعرة كويسة جدا لأنك بتكتبي شعر كويس ينقصك بس انك تقتعني بده و تكتبي كتير و بسعي للتقدم
    النص ده عجبني بدرجة كبيرة
    أولا موزون الهم إلا هنات صغيرة ممكن تتصلح
    ثم عجبني على مستوى اختيار الالفاظ رغم سهولتها و عاديتها لكنها كانت مختارة بعناية و في مكانها
    تقطيع الجمل كان مناسب بطول النص
    و جميل في بعض المواضع
    زي :

    تِدور يمكن تلقاها فـ قصة حد
    اهتم بجد
    حفظها فـ صورة

    تحياتي ليكي و لنصك

    ردحذف
  2. بجد اكثر من رائع
    وخصوصا لاغنيه الي شغاله
    وخصوصا لاني بحب الصيني
    تحياتي

    ردحذف
  3. حلو كلامك و حلو تعبيرك واسلوبك.كل مرة بلاقي فيه جديد مش واخد بالي منه في المرة الأولي.و ده سر كلماتك. ممكن اشوفها بكذا معني .عجبتني الفكرة.
    وجوا طريق الوهم
    لقيت خطوايها
    حلوه قوي الجملة دي.

    ردحذف
  4. مادو

    وأنا اعتز برأيك يامحمد
    لكن المشكلة فيّ ليس في رأيك

    أني مازلت غير مقتنعة أن ما أكتبه يصنع فرق وهناك أحسن منها بمساحة كبيرة جدا والأحسن يعجبني عما أكتبه فما حال من يقرأ أصلا لي ؟

    لا أريد إحباطك لكن وعد سأحاول

    وشكرا لاهتمامك باعطاء رأيك انتظره دوما

    وتحياتي لك ولمرورك دوما

    ردحذف
  5. تامر حسن

    شكرا لكَ بصدق

    والأغنية كوري لمسلسل ونتر سوناتا

    باسم dont forget me
    اعمل بحث عن كلماتها هتعجبك جدا
    والمهم الموسيقى واحساس المغني بالمعنى
    هيخليك تحسه ولو متعرفش اللغة

    شكرا لمرورك الاول
    واتمنى ألا يكون الأخير

    ردحذف
  6. lockash

    اسعدني رأيك الأكثر من نصي
    واهتمامك بالمتابعة

    وشكرا لمرورك البهي

    ردحذف

  7. بتحسس ع الجدران
    يمكن تتكعبل
    فـ الظل المكسور جوا المريات
    مدرتشي إن الفرق ما بينهم
    كان الخطوة
    لو لفت راح تعرفها

    كلمات جميييله
    البوست الجديد بتاعى نزل وعايزه تعليقك طبعا

    ردحذف
  8. sendralla

    شكرا لكِ
    أنتِ الأجمل منها

    وإن شاء الله لي زيارة للبوست قريبة

    تحياتي

    ردحذف
  9. تتسحب جوا صفح النت
    تِدور يمكن تلقاها فـ قصة حد
    اهتم بجد
    حفظها فـ صورة
    وحط فوقيها حِداد للذكرى
    لكن ملقتش
    .
    .
    .
    وقفت تتشرط
    ايه تسمحله عبور الحد
    وايه بتسد فراغ القوس قدامه
    وتبعد
    وجوا طريق الوهم
    لقيت خطوايها
    بتشق طريقها بره أقواسها
    وتخرج
    وبترجع بالمقلوب
    نقطة فـ أول جملة
    وماتفقوش

    حلوة أوي.

    حتى ولو علي أن أعترف بأني إضطررت لمعاودة القراءة عدة مرات, كونها مكتوبة بالعامية.

    ردحذف
  10. بصراحة انا مش عارف اقول ايه

    كل حاجة فى البلوج ده جامده اوى


    وانتى فنانه بجد يا نهى

    ربنا معاكى

    ردحذف
  11. نهى انا عايزك تسعدينى فى تظبيط البلوج بتاعى لو مفهاش رخامة منى كده من اول مرة ادخل فيها البلوج اكون رخم

    لو ينفع تخدى اميلى لو هينفع اوك لو مش هينفع وانتى مش عنك وقت خلاص ولا يهمك

    شكرا

    ردحذف
  12. sharm

    الأجمل مرورك

    تحياتي

    ردحذف
  13. Straniero

    الأجمل مرورك الذي أسعدني

    وأعتذر عن إرهاقك بقرائتها

    تحياتي لمرورك الأول
    أرجو ألا يكون الأخير

    ردحذف
  14. أجدع واحد في الشارع

    شكرا لمرورك الأول
    وشكرا لإعجابك بمدونتي المتواضعة

    ومرورك أجمل منها بالطبع
    بالنسبة لميلي كنت أود حقا مساعدتك

    لكن موضوع إعطاء ميلي هذا صعب بعض الشيء

    فاعذرني على بواخة ردي
    وكنت أود فعلا مساعدتك

    لكن فيه في اللستة الخاصة بشموس مزاجي موضوع عن كيفية عمل مدونة تستطيع دخوله وطلب مساعدة صاحبها

    تحياتي
    واتمنى ألا يكون مرورك الأخير

    ردحذف