28 أكتوبر 2007

ياقصورك ياشارع شامبليون


صدفة رائعة جدا أهدتني استمتاع كأني في أحد أفلام رعب واستكشاف مناطق محض صدفة


كنت أنا والست غاديليا " غادة الكاميليا " في وسط البلد يوم الأربعاء 24/10 وطبعا بعد اللف قررنا فجأةً السؤال عن التكعيبة اللي هوسنا بيها اخونا الشباب والأدباء كفضول البشرية المعهود لرؤيتها فقط


وبعد السؤال والاستفسار واحنا في طريقنا ليها وقفنا عند قصر شكله غريب عن باقي اللي حواليه اللي هيا طبعا سمكرية وقهاوي ومناطق لرمي الزبالة ومحل لتصليح العربيات وهكذا ، المهم إن القصر في وسط كل ده تحفة معمارية عدى عليها سنين وشبابيكه ازازها مكسر والحيطان متربة ولونها بقى الشكل المحبب اللي يحسسك بالحنين لزمن قديم ، يمكن وصفه صعب بس شعور بيخرجك من فترة حالية لرائحة أيام الفراعنة والبشوات والمعمار القديم ... يعني حالة بحسها نوع من الوقار للأماكن ديه زي ما بتشوف جدك أو جدتك كده بيبقى ليهم طعم تاني لزمن تاني

المهم نظرا إنه فعلا جذبنا فصورت شكله الخارجي ونسينا طبعا أمر الست تكعيبة وقعدنا نلف حواليه ونصوره من بره
وخدناه من كل جوانبه عسى نلاقي باب ندخل منه ... يعني أمل
وطبعا الناس كانت بتبصلنا ولا كأننا عالم مجانين وهبل ، والصدفة إن فيه مدرسة بنات كانت ميعاد خروجها وبنت سألتنا ايه اللي انتوا بتصوروه ده بصراحة كنت عايزة أقولها بقى بتعدي عليه كل يوم ومفكرتيش تسالي عنه
يلا مجتش عليها

المهم قعدنا نصور لحد ما فعلا لقينا الباب

وعرفنا ان القصر للأمير سعيد حليم باشا


وعرفت بعد كده من النت إنه كان بناه في نهاية القرن التاسع عشر لزوجته غير أنها رفضت واختارت قصرا آخر فأهداه الأمير للحكومة التي حولته إلى مدرسة حتى نجحت وزارة الثقافة في شرائه واخلائه خلال العام الماضي



أموت واعرف مين يرفض يسكن في حاجة زي كده أصلا ده لو فرشولي في ترابه ملاية واسكنه هسكنه ... وعلى رأي غادة أنا لو من جوزها أطلقها

وديه صور للقصر من جميع الجوانب



ـ ديه صور للقصر من الخارج :ـ





ـ وديه صور للقصر من جوا : ـ

ده شكل الباب الخاص بالقصر من جوا

ده شكل الباب الخاص بأحد الغرف الخاصة بالقصر

ده مش محتاج شرح ده المدخل لما تدخل من الباب عالطول

ده شكل السقف بتاعه

ده الدور التاني من القصر

وديه أعمدة في إحدى بلكونات القصر الأعمدة بتاعته أصلا عليها رسومات لأسود وأطفال وبنات على شكل ملائكة

زي الرسم اليوناني كده

وديه صورة من البلكونة على جنينة القصر


الشجر بينمو بشكل طبيعي بدون اهتمام تحس إنه رغم التراب وعدم الاهتمام لساه عريق وفيه انتعاشه مريحة تديك احساس بالهدوء النفسي
برده صورة من البلكونة لأحد جوانب القصر كانت غالبا حجرات صغيرة للموسيقى أو مرسم أو تِراس حاجة زي كده

ده صورة لمدخل لحجرات القصر

ـ وديه صور لخارج القصر بس جوانبه من جوا : ـ





ديه قاعة كبيرة خارج القصر من على الجنب شبابيكها عليها فوق نحت لملائكة أطفال وبنات


معرفتش أجيبها كويس


بس كده


المهم بعد كده بدأنا نسأل ع التكعيبة تاني والمفاجأة اكتشفنا إنها قاعدة فارديين فيها كراسي جنب سور القصر بالظبط

بجد اتفرست

وبقول لأهالي التكعيبة مين في الدنيا يبقى وراه حاجة زي كده وميحكييش عنها

يلا ماعلينا

وقد انتهى النشرة التجولية في وسط البلد وكل شامبليون وانتو منوريين


--------

هناك 13 تعليقًا:

  1. شوفتى الحجرة اللى دخلناها وكانت المدرسه تقريبا عاملنها حجرة اقتصاد منزلى أما أنا كنت مفروسه بشكل
    القصر ده بجد تحفه ولنا الفخر اننا أول حد يزوره لأن افتتاح القصر بعد حوالى عشر سنين ياجماعه ربنا يدينا ويديكوا طولة العمر

    ردحذف
  2. اه طبعا يابنتي هوا أنا انسى

    الحيطان اللي مرسوم عليها كمان
    ولا السقف اللي متلون


    بس تصدقي احلى حاجة لما السلالم كانت بطقطق هههههه
    ونقول بس هيا موتة ولا أكتر

    ردحذف
  3. هههههههههههههههه
    مش أول حد ولا حاجة
    يا بنتي القصر ده أول حاجة بتلفت نظر أي حد جديد
    بس بالتعود هتلاقيه بقى شئ عادي معتاد
    و لذلك محدش بيحكي عنه

    ردحذف
  4. هاي انا بقي من ارباب التكعيبه و كل يوم بقعد ابص لقصر شامبليون و اتحسر علي الاهمال اللي فيه خصوصا و اني اساسا اثري

    ردحذف
  5. مش اول حد ازاى يا مادو افندم مش فاهمة دول الناس بتوع الاثار لسة مستلمينه من كام يوم إلا إذا كنت من تلامذة المدرسة وده بقى اللى لازم يوضح معقول درست في المكان التحفه ده ولا تسللت اليه زى ما انا كنت ناوية أنط السور
    سورى يانهى مجرد استفسار ياقمر

    ردحذف
  6. جميل فعلا يا نهى
    صور جميلة
    تسلم ايدك
    معرفش ان عندنا اماكن حلوة كده


    سلامى ليكى

    ردحذف
  7. مادو

    يابني انت دخلته
    المقصود باول حد دخول القصر فعلا

    يعني الصور ديه من جوا القصر نفسه خدتها من جوا

    ومافيش حد دخله لسه موستلمينه طازة ومش مسموح الدخول اوي
    الراجل حس ان احنا هنموت لو مدخلناش فسمحلنا
    وبعدين ان يكون شيء عادي ديه كارثة في حد ذاتها
    قصر زي ده عادي ! طب ازاي قولي

    يلا يادفعة ع الجيش بتاعك
    وربنا معاك
    نورت المدونة من تاني
    ------

    انسان

    ونحن نتحسر معك أكثر
    يلا ربنا يسهل ويفك حال البلد ديه

    نورتني وياريت تكررها تاني

    ------

    غادة

    ولا يهمك ياجميل
    بس محمد كان قصده على رؤيته بس متهيئلي
    مش قصده على دخوله

    ------

    برنسيسز دودو

    ويسلم مرورك ياجميلة
    والله ولا أنا لولا الصدفة

    وسلامي لك أكثر

    ردحذف
  8. عزيزتي نهي

    فعلا القصور بتاعت زمان دي تلاقي ليها طابع خاص
    انا دايما مياله للمباني في الفتره دي بيكون ليها طابع مميز و جمالي تمام زي مباني ميدان الكوربه في مصر الجديده
    بشكرك علي المعلومات القيمه و الصور الجميله

    تحياتي ليكي عزيزتي

    ردحذف
  9. ياسلام ياسلام

    قصر ومعمار وكلام كبير كبير يعنى

    بس انت مش حكيتى باقى اللى حصل
    عموما خليها ف سرى

    مش هشوفك بقى وللا ايه؟

    سلام ياقمر

    ردحذف
  10. أجندا حمراء

    وأنا برده بميل ليها
    وأنا اللي بشكرك على مرورك جدا

    ودمتِ عزيزة

    -------

    عين ضيقة

    أه واخد بالك انت ياعم الجاسوس
    بتسيحلي هههه

    طب احنا بيهمنا
    اقولك خليها في سرك احسن

    وإن شاء الله
    اعمليها بس ونوري قاهرتنا
    وألف سلامة ياجميلة

    ------

    ردحذف
  11. يعنى ما شفتيش التكعيبه
    وتقوليلى قصر وبتاع
    لو شفتى جمالها كنتى نسيتى القصر ده خالص
    ولا لو شربتى جنزبيل
    بسي القصر ده حلو وانا فعلا ما اخدتش بالى منه بالذات مع ان وسط البلد كله مبانى قديمه
    هبص عليه المره الجايه

    ردحذف
  12. محمد هنداوي

    مقريتش المقرر كله يادوك
    منا قلت في اخر البوست اني سالت ع التكعيبة وطلعت جمب سور القصر بالظبط
    حاجة توفرس

    احم ومبحبش الجنزبيل خالص خالص يعني

    ونورتنا طبعا
    وابقى بص عليه ده ماينفعش مناخدش بالنا منه أصلا

    ردحذف
  13. معنقدش اصلا فيه حد بيحب الجنزبيل
    ومادام التكعيبه جنبه على طول يبقى انا عرفته خلاص
    بس شفته من بره بس
    حاولى بقى تكتشفى ليه اسمها التكعيبه مع انها مش تكعيبه ولا حاجه

    ردحذف