خريفية

بتعيشي وهم كبير
حواليكي بيغنوا فوارس
فوق دهور الخيل
مخبيين السناكي في جراب القلب
ومخبيين الغناوي في جراب الليل
أنا جتلك وأنا ماشي على كتفي حمل تقيل
لو كان جمل
كان عض بنيابه الخذان !

....

ايدى على الرحاية
وقلبى حب .. آنا بطحنه بأيدى
لكنه ريم البحر في بياضه ..
وجلابيتى سواد ..
ودورى يا رحاية
وتحت توب الأحزان
دورى مع الدايرين
ولمي في الغربه .. وفي الخلان
وفى الشعور البكر والمطويه
والشومه .. والكرباج .. والعكاز
دورى يا رحايه ..

( نص الكلام ده بتاعي )

والنص مش ليه ..

( أنا جبته بدراعي )

المغربيه عيون
المشربيه مغرب
فى قلبى وزنة كلام
يا ايدين يا وزانه
ينشد فوقها الحزام
وتلعبوا الزانه
والناس عيونهم كلام
وكله كلام .

( بنيه يا بنيه
فى كل أرض مشرعه وطالعه
شبه الكنيسه .. والمادنه والحريه
شبه النسيم والميه والزلعه
أرضك حلال ... للرجال )

زرت البلاد البعيده
من غير بحور أو ركوبه
وشربت نخب لقا العيون تعب
والله طريقك يا غريب ؟؟؟
الحب علشانه أموت .. وأعيش .. وأتغلب .
وشفت ناس قفاطين .. على عضام
وناس بتتخفى في توب الناس
والله يا ولد الناس .. دول ناس مازرتهمش ..


* * *

( ما حد خالى من الهم
حتى قلوع المراكب
مسكين من قال يا عم
لو كان ع السرج راكب )

يا أرضى يا حبيبتى ..

بامشى فى نسيمك .. زى طير المغربيه الراجع
منهوك وشارب من دما الخطوه ...
سدرى مزارع ..
اقب فى هوه
وأشب من هوه
والسر كاتمه فى سدرى من جوه
آااه .. لو فاتونى العمر اتمشى
لا أمشى فى جبالك .. خضرتك .. دربك
وأعشى طيرك قبل ما أتعشى ..
آه .. لو فاتونى أدق على بابك
لا أدق وشم الحب في قلبك
وتزهر الغنيوه فى تيابك

يا أرضي يا حبيبتي ..

بتفتحى حضنك لحضنى مواسم
طواحينك الدايره لها مواسم
والعشق له مواسم .
ما هو برضه زى ولادك لمطاريد
بتملسى عليهم بيد .. وتسبلى عنيهم بايد
واللقمه في ايدينا لها كيف ومواسم *

....

* النص لـ عبد الرحيم منصور
و من فيلم الزمار